close
分拆 iPod 成本
2010年10月01日
Apple
以前左丁山講過，睇富士康業績報告，知道佢嘅毛利率與純利率甚低，生意大只係表面風光。富士康為蘋果製造 iPhone、 iPod，以軍事方式管理工廠，規模大得驚人，此係香港工廠、廠家望塵莫及之處，但睇上市公司股票，最緊要睇盈利率、每股盈利、增長率與管理層，並非睇佢生意有幾大。 GM（通用汽車）破產重組前，生意夠大咯，股東咪一殼眼淚！
蘋果以低價向富士康買入 iPhone、 iPod，賺到笑，成為世界上最大市值嘅科技公司，係美國的驕傲！蘋果之市值及股價，建基於創意及善於利用中國低成本工廠。溫家寶最近在美國會見友好團體，借用美國加州大學嘅研究結果，指出一部 iPod有 457件零件，美國售價為二百九十九美元，其中蘋果得 76元，分銷商零售商得 75美元，零件製造商得 7元，美國人共得 158元，佔零售價 52.8%。
此外，日本製造不少 iPod零件，得 27元，台灣零件得 4元，南韓零件得一元，以上合共 190元，佔零售價 63.5%，剩下嘅就係直接勞工成本與各種各類零件費雜費，加加埋埋應該係 109元，溫家寶話所有零件送到中國裝配，中國實際所得嘅附加值只有 6元，但因為 iPod由中國出口往美國，在國際貿易統計上，中國輸出 148元（即 299減去蘋果及分銷零售商所得），表面上中國嘅出口數字好大，但實際得益只係出口值嘅 4%。
（參考網上資料： Capturing Value in a Global Innovation Network: Comparing the iPod and Notebook PCs, University of California, Irvine, Oct 3, 2007）。
從以上所知，富士康作為加工廠，只係得個做字，每件賺雞碎咁多，故此美國議員口口聲話中美貿易不平衡，中國順差過大，要逼人民幣升值，令中國輸美產品喪失一啲競爭力，以保護美國工人嘅工作職位等等，真係大大笑話，假如一間美國工廠聘請一百萬工人在美國裝配 iPod，以美國工人嘅薪水，美國工廠肯只受附加值 6美元咩，發訂單嘅主動權在 Steve Jobs，奧巴馬不妨召佢入白宮訓斥一番，要佢愛國，將 iPod訂單發畀美國工廠就得啦！
（左丁山）
全站熱搜
留言列表
