close
新聞耳目
無問病歷唔驗尿 直擊醫生五分鐘處方迷姦藥
2012年03月01日 Next Mag
青少年濫藥問題嚴重，原來除了因為不法之徒向青少年兜售丸仔外，有罔顧道德的無良醫生亦是幫兇之一。本刊發現，在灣仔行醫逾廿年的黃偉忠醫生，竟然隨便向青少年處方俗稱 R丸的精神科藥物。
本刊記者親身測試，發現攞藥過程極度容易，就算初次求診，不用檢查驗尿，只需短短五分鐘，毒害比白粉、藍精靈更猛烈、服後會失憶的迷姦藥，便可輕易到手！
西醫黃偉忠的診所位於灣仔得利商業大廈十一樓 D座，記者上月親身到診所「攞藥」，結果一擊即中，整個過程不消五分鐘，便成功獲處方三十粒俗稱 R丸的精神科藥物，收費四百元。
http://easss.com/pharmacy
http://easss.com/pharmacy
黃：有咩唔舒服？
記：我嚟攞 R丸。
黃：要之前食過先開得喎，之前邊個醫生俾你食過？
記：北角有個姓蕭嘅……
黃：蕭××呀？
記：好似係呀，都唔記得個名喇。
黃：佢嗰度冇開好多年喇喎，咁你即係食咗好多年？
記：係呀……之前……
未待記者說完，黃偉忠即機械式地問記者有否食煙飲酒、藥物敏感及其他病，之後便替記者量血壓，然後說出「四大條件」：「嗱，呢隻藥係受管制好嚴格嘅藥，你要親口應承我四樣嘢，我先可以開藥俾你︰第一，次次（嚟）都要度吓血壓；第二係食完即刻要瞓，唔可以再做其他嘢；第三，一定要隔十五日先可以再嚟一次，如果你嚟早咗我哋都唔開得，如果唔係我都犯埋法；第四，呢隻藥唔可以帶出街周圍去，你今晚拎到返去一定要放喺屋企，聽日再拎出街都係犯法。」
14:43入診室
診所內病人不多，記者拿出身份證登記後等不到三分鐘便可入診室見黃偉忠。
14:45閒聊幾句
甫一坐下，黃偉忠只短短詢問數句，未有問清記者的病歷，亦未有替記者做詳細的身體檢查，便替記者量血壓。
14:47量血壓
黃偉忠邊替記者量血壓，邊着記者應承其「四大條件」。
14:50開藥
由問診到處方開藥，全程不到五分鐘，黃偉忠便向記者開出三十粒 R丸，並收診金連藥費四百元。
五分鐘攞藥
記者點頭答應後，黃即處方開藥，更說︰「你應承到我呢四大條件嘅話，我就開三十粒俾你啦，你而家喺出面等！」在整個診症期間，黃偉忠完全無問過記者為何要服食 R丸，而且更沒有問記者病歷紀錄。記者由踏入診症室到取藥離開，全程只是五分鐘，過程更有錄音及錄影作證。
記者在診所門外連日觀察，發現向黃求診的病人，絕大多數都是年輕人，個個看似精神奕奕，而且他們只會在診症室內逗留三數分鐘，拿藥後便匆匆離去。記者不但見過有青年邊飲啤酒邊求診，甚至見過三名青年聯群結隊上門「攞藥」，然後更在電梯內明目張膽分藥，其中一名青年更直言：「今次攞多幾板（排），有排玩！」
原來，黃偉忠處方 R丸「鬆手」，早已街知巷聞。本刊成功接觸一名濫藥青年阿輝，他承認幫襯黃偉忠超過五年。「我成條邨百幾個 friend都喺佢度攞藥。成班 friend一齊玩，佢哋俾咗幾粒我食，將兩三粒含喺口入面兩三個字，成個口就會藍晒，進入『忽』嘅狀態。」
阿輝直言食 R丸極易上癮，「越食越多，好似食糖咁。呢隻藥本身好難攞，我識人專登去東區醫院扮癲，排期幾個星期都係攞得幾粒，所以朋友就介紹我去黃醫生度攞藥，容易好多！」
他回憶首次到黃醫生的診所取藥情形，跟記者的經歷相若，阿輝說︰「佢話就話叫你唔好亂食、唔好拎出街，但係攞得藥，邊會理得咁多？」眼見 R丸唾手可得，阿輝越食越癲，每日動輒可以吃上廿粒，手頭沒貨而又未夠十五日期限，就託朋友到黃的診所取藥：「好多人都係咁，有啲人甚至攞落場俾啲妹食。」他說甚至有人取藥後再到夜場轉售圖利，起碼賺一倍，「一板十粒，落場放至少賣二百五十蚊。」
「我食過 K仔、 five仔、大麻、藍精靈，全部都唔夠呢隻藥咁勁。食完會情緒失控，周街打人搶嘢，但係又會唔記得晒自己做過啲咩，好似洗咗腦咁，第二朝起身先知自己瞓咗喺條街度。」阿輝年前便因服藥後於街上連環搶劫，被送入獄。
認識毒品禍害，阿輝在獄中成功戒毒，更希望可以踢爆黃偉忠的惡行，他憤言：「我有個 friend一次食廿五粒，食到變咗植物人，最後仲死喺瑪麗醫院。呢個醫生根本就唔係醫人，係害人！」
R丸用作迷姦藥
R丸，英文為 Rohypnol，本名氟硝西泮，又稱十字架，此藥多用作醫治嚴重焦慮、失眠或酗酒等，根據羅氏藥廠資料，醫生訂購 R丸，每粒批發價$4。
香港精神科醫學院李永堅醫生表示，由於 R丸易上癮，已極少開給病人，「我喺醫院做咗咁多年，都有差唔多十年冇開過呢隻藥。 R丸藥性好強，就算病人病情真係好嚴重，都會儘量開其他藥頂替。」
精神科醫生張建良則指，每次處方此藥都會相當小心︰「要同病人做足身體檢查同尿液檢查，仲要 check埋病歷，確定真係有需要先會開。」據指，由於服後會出現短暫失憶，不法份子會用作迷姦之用，故此藥在美國、加拿大等地早被列為禁藥，而在香港則屬 衞生署嚴格管制的精神科藥物。
飲住啤酒攞藥
17:43
不少年輕人到黃的診所極速攞藥，記者親見一名年輕人一邊喝着啤酒，一邊求診。
17:45
由進入診室到拿藥，前後不到五分鐘。
17:55
取藥後，仍然啤酒不離手，在街上游蕩。
監管形同虛設
被踢爆輕易處方 R丸的黃偉忠，在一九八三年畢業於香港大學醫學院內外全科，一九八九年再獲香港中文大學家庭醫學文憑，他在八七年開始於灣仔行醫。黃過去多年來投資有道，買賣物業曾賺接近一千六百萬，現時持有堅尼地道萬信臺及兩個碧瑤灣單位市值逾三千多萬，家底甚豐。黃偉忠並非精神科醫生，不過根據本港法例，任何執業醫生都可以處方精神科藥物。
精神科醫生張建良指， R丸這類精神科藥物受嚴格管制，每次處方此藥物都要做記錄︰「呢隻藥要上鎖，鎖匙交由醫生保管，每次入咗幾多粒藥、開咗幾多粒藥、開俾邊個，都要記低，如果 衞生署發現記錄錯咗，會處分。」
不過，有醫學界人士指，除非有舉報， 衞生署幾乎不會主動巡查本港的診所，亦不會核對醫生的處方記錄，所以，所謂監管根本就形同虛設︰「 衞生署根本就唔夠人手，好多醫生由開診到而家都未被人巡查過，所以開咩藥根本冇人理。醫生攞正牌向藥廠攞藥，病歷又由人手寫，有咩事隨時可以改，所以根本就好難俾人捉到。」
對於黃偉忠濫開 R丸，本刊週一到其診所向他查問，他只拋下一句「醫生係按病人病情開藥」後，便衝入升降機離開。本刊同一時間將所有資料轉介至 衞生署， 衞生署僅回覆「有恒常機制監察醫生診所及藥房」，但卻未有表明會為此事跟進。
R丸是受嚴格管制的精神科藥物，理論上要存放於醫院的 DD（ dangerous drugs）櫃內並上鎖，鎖匙要交由藥劑師保管；至於一般診所，亦要將此藥上鎖，鎖匙則由醫生保管。
記者連日來於黃偉忠診所門外，發現不少青少年求診，全部都是五分鐘「完事」──由踏入診所到取藥離開，全程不超過五分鐘！
黃偉忠週一否認亂開藥，更急急腳逃入升降機。
黃偉忠週一否認亂開藥，更急急腳逃入升降機。
全站熱搜
留言列表
