close
人氣急升冇得 鬼妹仔陳明恩搵中醫打救
3週刊 第 695 期 1/31/2013
熱爆專題
做藝人當然希望可以大紅大紫受萬人愛戴，但成名的代價又有幾多人見到？就像近日憑《老表，你好！》中飾演「喊包」聶小茜而人氣急升的外籍女演員陳明恩（Corinna Chamberlain），除了忙於為《老》宣傳及接受傳媒訪問外，又忙於灌錄自己的處女大碟，身體開始出現了警號。本身是澳洲血統但在香港土生土長的陳明恩，決定放棄西方醫術轉睇中醫，希望可以改善自己的健康狀況，為在娛樂圈大展拳腳做好準備！
http://easss.com/dvd
本刊日前發現近日人氣急升的陳明恩，日前獨自在紅磡出現，原來當日她趁有兩個小時空檔，在友人介紹下特別到這間口碑不錯的中藥店睇中醫，原來這位在香港土生土長的澳洲女生，一直都鍾情中國傳統文化，最希望就是做「港女」，一個屬於香港的少女。
睡眠不足壓力大
本週一（28日），本刊在紅磡發現陳明恩在一間中醫藥店內排隊睇中醫，由於她的外國人look及近日人氣急升關係，她的出現曾經引來小哄動。當日她等了約一小時後才可見中醫師，記者入內買中藥，發現中醫師未有因為陳明恩是外國人關係而特別照顧，如常地為她把脈及「望聞問切」，記者聽見中醫師確診陳明恩是因為工作太多睡眠不足，再加上壓力大而身體出現不適，最後為她開出五日份量的中藥。由於陳明恩工作太忙關係，因此只要求店方代為煎兩日藥翌日自取，另外三日就自行在家煎藥，埋單510元。
喜愛過年利是
看完中醫後，陳明恩到中藥店旁的酸辣粉用膳，由於人氣急升關係，無論是食客或店員都紛紛上前要求合照，陳明恩亦笑住口有求必應逐一合照，此時她發現有記者在門口拍照，她即以流利廣東話禮貌地叫記者入內。
記：3週刊 陳：陳明恩
記：頭先見妳去睇中醫，身體唔舒服？
陳：係呀，其實都係舊年積埋，日日都要拍劇冇點抖過，所以皮膚開始痕癢同紅斑，一直都有睇開西醫，但效果唔理想，於是轉睇中醫，但之前睇過兩個，一個話我寒底，一個又話我熱底，都唔知信邊個好。有個朋友睇過話呢個中醫話幾好，所以今日有時間就過睇。
記：係咪一直都對中國文化好有興趣？
陳：係呀，我香港出世、香港讀書，一直都好鍾意中國傳統文化，都覺得自己性格幾中國人，我之前都講過我係「奶黃包」，外面白色入面黃色。好似外國人好講私人空間，但我就最鍾意柴娃娃，一家人一齊生活，感覺好warm。
記：就過中國農曆新年，咁妳屋企會唔會跟中國傳統過年？
陳：會呀，年初一起身我會同爸爸媽媽拜年，佢又會派利是俾我，試過佢唔記得我會提佢俾利是，我又會去朋友屋企拜年利是，我好鍾意過中國新年，好有氣氛。
記：咁揀男朋友又會唔會首選香港男仔呢？
陳：其實我冇特別指定，鍾意咩國籍都得，但咁多年我咁大個都未拍過拖可能男仔見到我鬼妹仔以為好難追啦。
三十歲人未拍過拖的陳明恩曾承認自己是處女，純過蒸餾水，果然貫徹其基督徒的作風！
與蘇永康
合唱〈來夜方長〉
原名Corinna Chamberlain的陳明恩，現年30歲，父母是紐西蘭及澳洲人，早年父母因為傳道而移民香港，在香港落地生根。陳明恩於香港出生及長大，因為父母要融入香港，所以自少就接受港式文化薰陶，因此就得一口流利粵語。自小熱愛音樂的她，在演藝學院主修音樂劇，畢業後曾參與不少舞台劇演出。開始叫人留意的表現，是08年在蘇永康的演唱會中合唱〈來夜方長〉。07年她加入TVB開始演出，但角色未有太大發揮機會，直至《老表，你好！》才人氣急升。
星級中醫師
陳明恩是次光顧的中醫師位於紅磡德民街的長城集團藥業，屬紅磡舊式的中藥店，每天求診人士眾多，幾乎天天都大排長龍。本刊翌日致電向為陳明恩診症的陳醫師查詢，他表示陳明恩只是一般的操勞過度，屬平常症狀。陳醫師表示無論是外國人或是中國人，在中醫角度是完全沒有分別，「外國人同中國人都係咁睇，最重要係對症下藥，睇法完全冇分別。」據了解，長城在區內頗有名氣，不少藝人例如張美妮、新城電台的DJ等等，都會到長城睇病。
全站熱搜
留言列表
